ᱢᱚᱭᱩᱨᱵᱷᱚᱸᱡᱽ ᱚᱰᱤᱥᱟ
ᱢᱟᱹᱼ ᱒᱗-᱐᱔ᱼ᱒᱐᱑᱙
ᱚᱰᱤᱥᱟ ᱯᱚᱱᱚᱛ ᱢᱚᱭᱩᱨᱵᱷᱚᱸᱡᱽ ᱡᱤᱞᱞᱟ ᱛᱤᱨᱤᱝ ᱵᱟᱜᱷᱟ ᱟᱹᱛᱩ ᱜᱚᱨᱟᱢ ᱨᱮ ᱢᱤᱫ ᱥᱟᱱᱛᱟᱲ ᱜᱷᱟᱸᱨᱚᱡᱽ ᱫᱩᱠ ᱫᱚᱨᱮᱭᱟ ᱨᱮᱭ ᱩᱰᱩᱼᱰᱩᱵᱩᱜ ᱠᱟᱱᱟ ᱾ ᱚᱱᱟ ᱥᱟᱸᱣᱛᱮ ᱥᱚᱨᱠᱟᱨᱟᱜ ᱥᱚᱣᱟᱥᱛᱷᱭᱚ ᱥᱮᱵᱟ ᱡᱚᱡᱚᱱᱟ ᱛᱮᱦᱮᱧ ᱥᱩᱢᱩᱝ ᱥᱚᱨᱠᱟᱨᱟᱜ ᱠᱟᱜᱚᱡᱽ ᱠᱚᱞᱚᱢ ᱨᱮᱜᱮ ᱡᱚ ᱵᱟᱦᱟᱜ ᱠᱟᱱᱟ ᱾ ᱟᱵᱚ ᱞᱮᱠᱟᱱ ᱥᱟᱫᱷᱟᱨᱚᱬ ᱦᱚᱲ ᱴᱷᱮᱱ ᱛᱮᱦᱮᱧ ᱥᱚᱨᱚᱠᱟᱨᱜ ᱥᱚᱣᱟᱥᱛᱷᱭᱚ ᱥᱮᱵᱟ ᱛᱮᱦᱮᱧ ᱯᱷᱮᱞ ᱚᱜ ᱠᱟᱱᱟ ᱾
ᱵᱮᱣᱨᱟ ᱠᱷᱚᱱ ᱵᱟᱰᱟᱭ ᱟᱠᱟᱱᱟ ᱵᱟᱝ ᱢᱟ, ᱢᱚᱭᱩᱨᱵᱷᱚᱸᱡᱽ ᱡᱤᱞᱞᱟ ᱛᱤᱨᱤᱝ ᱵᱞᱚᱠ ᱨᱮᱝᱜᱟᱲ ᱵᱮᱰᱟ ᱯᱚᱱᱪᱟᱭᱚᱛ ᱵᱷᱤᱛᱟᱹᱨ ᱨᱮ ᱢᱮᱱᱟᱜ ᱟᱠᱟᱫ ᱵᱟᱜᱷᱟ ᱟᱹᱛᱩ ᱜᱚᱨᱟᱢ ᱨᱤᱱᱤᱡ ᱑᱓ ᱥᱟᱞ ᱨᱤᱱᱤᱡ ᱢᱤᱫ ᱥᱟᱫᱷᱮᱨ ᱵᱤᱴᱤ ᱥᱤᱱᱜᱚ ᱴᱩᱰᱩ ᱛᱤᱠᱤᱱ ᱫᱚ ᱟᱹᱠᱤᱱᱟᱜ ᱢᱚᱪᱟ ᱨᱮ ᱟᱹᱰᱤ ᱵᱚᱛᱚᱨ ᱜᱮ ᱦᱟᱦᱟᱲᱟ ᱟᱱᱟᱜ ᱢᱚᱪᱟ ᱜᱷᱟᱣ ᱵᱮᱢᱟᱨ ᱨᱟᱠᱟᱵ ᱟᱠᱟᱫ ᱠᱤᱱᱟ ᱾ ᱡᱟᱸᱦᱟᱸ ᱫᱟᱨᱟᱭ ᱛᱮ ᱩᱱᱠᱤᱱ ᱵᱤᱴᱤ ᱛᱤᱠᱤᱱᱟᱜ ᱦᱟᱞᱚᱛᱷ ᱟᱹᱰᱤ ᱜᱮ ᱵᱟᱹᱲᱤᱡ ᱥᱟᱸᱣ ᱟᱜᱟᱢ ᱟᱹᱠᱤᱱᱟᱜ ᱧᱩᱛᱟᱹᱛ ᱜᱮ ᱟᱹᱭᱠᱟᱹᱣᱚᱵ ᱠᱟᱱᱟ ᱾ ᱱᱚᱛᱮ ᱨᱮᱝᱜᱮᱡ ᱜᱷᱟᱸᱨᱚᱡᱽ ᱨᱮᱭ ᱡᱟᱱᱟᱢ ᱟᱠᱟᱱ ᱥᱤᱱᱜᱚ ᱢᱟᱹᱭ ᱛᱮᱦᱮᱧ ᱟᱡᱟᱜ ᱨᱟᱱ ᱢᱩᱨᱜᱟᱹᱱᱚᱜ ᱞᱟᱹᱜᱤᱱᱛᱮ ᱫᱤᱥᱟᱹ ᱦᱚᱸ ᱛᱟᱭ ᱟᱫ ᱟᱠᱟᱱᱟ ᱾ ᱴᱟᱠᱟ ᱯᱩᱭᱥᱟᱹ ᱟᱵᱷᱟᱵᱽ ᱛᱮ, ᱨᱟᱱ ᱢᱩᱨᱜᱟᱹᱱᱚᱜ ᱨᱮᱭᱟᱜ ᱠᱩᱠᱢᱩ ᱦᱚᱸ ᱵᱟᱹᱲᱤᱡ ᱫᱤᱥᱟᱹ ᱫᱟᱲᱮᱭᱟᱜ ᱠᱟᱱᱟ ᱾ ᱱᱚᱝᱠᱟᱱ ᱫᱩᱠ ᱢᱩᱦᱤᱢ ᱵᱮᱲᱟ ᱨᱮ, ᱥᱮᱨᱢᱟ ᱪᱟᱸᱫᱚᱣᱟᱜ ᱛᱷᱩᱢ ᱟᱨ ᱫᱟᱭᱟ ᱛᱮᱜᱮ ᱱᱤᱛᱚᱜ ᱥᱤᱱᱜᱚ ᱢᱟᱹᱭ ᱛᱮᱠᱤᱱ ᱫᱚ ᱫᱷᱟᱹᱨᱛᱤ ᱯᱩᱨᱤ ᱛᱟᱞᱟᱨᱮ ᱱᱚᱣᱟ ᱥᱚᱢᱟᱡᱽ ᱨᱮ ᱡᱤᱣᱤ ᱠᱤᱱ ᱠᱷᱟᱱᱰᱟᱣᱮᱜᱼᱟ ᱾
ᱵᱤᱴᱤ ᱛᱤᱠᱤᱱᱟᱜ ᱨᱟᱜ ᱢᱩᱨᱜᱟᱹᱱᱚᱜ ᱨᱮ ᱜᱚᱲᱚ ᱥᱚᱦᱚᱫ ᱞᱟᱹᱜᱤᱱᱛᱮ ᱟᱹᱠᱤᱱᱟᱜ ᱜᱷᱟᱸᱨᱚᱡᱽ ᱨᱤᱱ ᱦᱚᱲ ᱟᱭᱢᱟ ᱫᱷᱟᱣ ᱟᱠᱚᱭᱤᱡ ᱨᱮᱝᱜᱟᱲ ᱵᱮᱰᱟ ᱥᱚᱨᱯᱚᱱᱪ ᱥᱟᱸᱣ ᱟᱭᱢᱟ ᱢᱟᱨᱟᱝ ᱢᱟᱨᱟᱝ ᱜᱚᱢᱠᱮ ᱠᱚ ᱴᱷᱮᱱ ᱚᱲᱟᱜ ᱦᱚᱲ ᱠᱚ ᱱᱮᱦᱚᱨ ᱵᱟᱲᱟ ᱞᱮᱱ ᱜᱮᱭᱟ ᱢᱮᱱᱠᱷᱟᱱ ᱨᱟᱱ ᱢᱩᱨᱜᱟᱹᱱᱚᱜ ᱨᱮᱭᱟᱜ ᱛᱮᱞᱟ ᱪᱮ ᱜᱚᱲᱚ ᱥᱚᱦᱚᱫ ᱚᱠᱚᱭ ᱴᱷᱮᱱ ᱦᱚᱸ ᱪᱮᱫ ᱜᱚᱲᱚ ᱥᱚᱦᱚᱫ ᱜᱮ ᱵᱟᱝ ᱠᱚ ᱧᱟᱢ ᱟᱠᱟᱫᱼᱟ ᱾ ᱱᱤᱛᱚᱜ ᱱᱚᱣᱟ ᱤᱫᱤ ᱠᱟᱛᱮᱱ ᱜᱮ, ᱥᱚᱨᱠᱟᱨ ᱪᱮᱛᱟᱱ ᱨᱮ ᱢᱤᱫ ᱢᱟᱨᱟᱝ ᱠᱩᱠᱞᱤ ᱨᱟᱠᱟᱵ ᱟᱠᱟᱱᱟ ᱾ ᱛᱮᱦᱮᱧ ᱫᱤᱥᱚᱢ ᱦᱚᱲᱠᱚ ᱞᱟᱹᱜᱤᱱᱛᱮ, ᱵᱤᱡᱩ ᱥᱚᱣᱟᱥᱛᱷᱭᱚ ᱠᱚᱞᱭᱟᱬ ᱡᱚᱡᱚᱱᱟ (BSKY), ᱨᱟᱥᱴᱨᱤᱭᱚ ᱥᱚᱣᱟᱥᱛᱷᱭᱚ ᱵᱤᱢᱟ ᱡᱚᱡᱚᱱᱟ (RSBY), ᱥᱩᱠᱚᱱᱭᱟ ᱥᱚᱣᱟᱥᱛᱷᱭᱚ ᱡᱚᱡᱚᱱᱟ ᱞᱮᱠᱟᱱ ᱟᱭᱢᱟ ᱥᱚᱣᱟᱥᱛᱷᱭᱚ ᱪᱮᱛᱟᱱ ᱨᱮ ᱩᱛᱱᱟᱹᱣ ᱞᱟᱹᱜᱤᱱᱛᱮ ᱥᱚᱨᱚᱠᱟᱨ ᱟᱭᱢᱟ ᱡᱚᱡᱚᱱᱟᱭ ᱮᱦᱚᱵ ᱟᱠᱟᱫᱼᱟ ᱾ ᱢᱮᱱᱠᱷᱟᱱ ᱥᱚᱨᱚᱠᱟᱨᱟᱜ ᱩᱱᱟᱹᱜ ᱡᱚᱡᱚᱱᱟ ᱛᱟᱦᱮᱱ ᱛᱩᱞᱩᱡ ᱛᱮᱦᱮᱧ ᱱᱚᱣᱟ ᱥᱚᱨᱠᱟᱨᱟᱜ ᱥᱚᱣᱟᱥᱛᱷᱭᱚ ᱡᱚᱡᱚᱱᱟ ᱥᱟᱱᱟᱢ ᱥᱟᱫᱷᱟᱨᱚᱬ ᱟᱹᱛᱩ ᱫᱤᱥᱚᱢ ᱦᱚᱲ ᱠᱚᱣᱟᱜ ᱫᱤᱱᱟᱹᱢ ᱡᱤᱣᱤ ᱨᱮ ᱯᱷᱮᱞ ᱟᱠᱟᱱᱟ ᱾ ᱚᱱᱟᱛᱮ ᱱᱤᱛᱚᱜ ᱥᱤᱱᱜᱚ ᱵᱤᱴᱤ ᱛᱮᱠᱚᱣᱟᱜ ᱜᱷᱟᱸᱨᱚᱡᱽ ᱫᱚ ᱫᱩᱠ ᱢᱩᱦᱤᱢ ᱨᱮ ᱩᱰᱩᱼᱰᱩᱵᱩᱜ ᱠᱟᱱᱟ ᱾
ᱱᱤᱛᱚᱜ ᱨᱟᱱ ᱢᱩᱨᱜᱟᱹᱱᱚᱜ ᱨᱮᱭᱟᱜ ᱜᱚᱲᱚᱥᱚᱦᱚᱫ ᱞᱟᱹᱜᱤᱱᱛᱮ ᱥᱤᱱᱜᱚ ᱢᱟᱹᱭ ᱛᱤᱠᱤᱱᱟᱜ ᱜᱷᱟᱸᱨᱚᱡᱽ ᱫᱚ ᱛᱮᱦᱮᱧ ᱢᱟᱭᱟ ᱟᱹᱱᱤᱡ ᱵᱚᱝᱜᱟ ᱛᱩᱞᱩᱡᱤᱡ ᱜᱚ-ᱜᱲᱚ ᱢᱟᱱᱣᱟ ᱛᱟᱸᱝᱜᱤᱨᱮ ᱢᱮᱱᱟᱜ ᱠᱚᱣᱟ ᱾ ᱥᱤᱱᱜᱚ ᱢᱟᱹᱭ ᱛᱤᱠᱤᱱᱟᱹᱜ ᱱᱤᱨᱚᱜᱽ ᱡᱤᱣᱤ ᱠᱷᱟᱱᱰᱟᱣ ᱞᱟᱹᱜᱤᱱᱛᱮ ᱥᱟᱨᱱᱟ ᱢᱮᱰᱤᱭᱟ ᱛᱮᱦᱮᱧ ᱥᱮᱨᱢᱟ ᱥᱤᱧ ᱪᱟᱸᱫᱚ ᱴᱷᱮᱱ ᱮ ᱱᱮᱦᱚᱨᱚᱜ ᱠᱟᱱᱟ ᱾
(ᱥᱤᱱᱜᱚ ᱵᱤᱴᱤ ᱟᱹᱠᱤᱱᱤᱡ ᱡᱟᱱᱟᱢ ᱟᱭᱚ ᱥᱟᱸᱣ)
Bureau Report- Sarna Media
No comments:
Post a Comment