ᱪᱷᱚᱛᱤᱥᱜᱚᱰ, ᱢᱚᱦᱟᱥᱚᱢᱢᱩᱫ
ᱦᱟᱦᱟᱲᱟ ᱨᱮᱭᱟᱜ ᱵᱮᱣᱨᱟ ᱟᱰᱟᱬᱤ ᱠᱚᱢᱯᱟᱱᱤᱭᱟᱜ ᱱᱟᱣᱟ ᱱᱟᱣᱟ ᱯᱨᱚᱡᱮᱠᱴ ᱞᱟᱹᱜᱤᱱᱛᱮ ᱡᱚᱨᱼᱡᱚᱵᱚᱨ ᱫᱚᱥᱛ ᱟᱹᱫᱤᱵᱟᱹᱥᱤ ᱴᱷᱮᱱ ᱠᱷᱚᱱ ᱦᱟᱥᱟ ᱨᱮᱡᱚᱜ ᱢᱟᱢᱞᱟ ᱟᱹᱣᱨᱤ ᱥᱟᱱᱛᱤᱜ ᱨᱮᱜᱮ ᱟᱨᱦᱚᱸ ᱱᱷᱟᱛᱮ ᱪᱷᱚᱛᱤᱥᱜᱚᱰ ᱥᱚᱨᱚᱠᱟᱨ ᱵᱚᱛᱚᱨᱜᱮ ᱟᱨ ᱦᱟᱦᱟᱲᱟ ᱜᱮ ᱵᱟᱝ ᱢᱟ ᱱᱤᱛᱚᱜ ᱟᱹᱫᱤᱵᱟᱹᱥᱤ ᱟᱠᱚᱣᱟᱜ ᱡᱟᱹᱛᱤᱭᱟᱹᱨᱤ ᱪᱤᱱᱦᱟᱹ ᱟᱜᱼᱥᱟᱨ ᱵᱟᱝ ᱠᱚ ᱫᱚᱦᱚ ᱫᱟᱲᱮᱭᱟᱜ ᱟ ᱢᱮᱱᱛᱮ ᱪᱷᱚᱛᱤᱥᱜᱚᱰ ᱥᱚᱨᱚᱠᱟᱨ ᱮ ᱨᱟᱭ ᱥᱟᱹᱛ ᱟᱠᱟᱫᱼᱟ ᱾
ᱟᱫᱚ ᱫᱮᱞᱟ ᱵᱚᱱ ᱱᱚᱣᱟ ᱜᱷᱚᱴᱚᱱ ᱨᱮᱭᱟᱜ ᱟᱨ ᱵᱟᱹᱲᱛᱤ ᱵᱟᱰᱟᱭ ᱞᱟᱹᱜᱤᱱᱛᱮ ᱪᱷᱚᱛᱤᱥᱜᱚᱰ ᱠᱷᱚᱱ ᱛᱟᱢᱮᱥᱭᱚᱨ ᱥᱤᱱᱦᱟᱹ ᱛᱤᱠᱤᱱᱟᱜ ᱨᱤᱯᱚᱨᱴ ᱥᱟᱸᱣ ᱾
ᱵᱟᱰᱟᱭ ᱟᱠᱟᱱᱟ ᱵᱟᱝ ᱢᱟ, ᱪᱷᱚᱛᱤᱥᱜᱚᱰ ᱨᱮᱭᱟᱜ ᱢᱚᱦᱟᱥᱚᱢᱢᱩᱫ ᱡᱤᱞᱞᱟ ᱨᱤᱱ ᱟᱹᱫᱤᱵᱟᱹᱥᱤ ᱠᱚ ᱞᱟᱹᱜᱤᱱᱛᱮ ᱵᱩᱨᱩ ᱵᱤᱵᱷᱟᱜ ᱫᱚ ᱟᱹᱫᱤᱵᱟᱹᱥᱤ ᱠᱚ ᱛᱟᱞᱟᱨᱮ ᱢᱤᱫ ᱥᱟᱠᱟᱢ ᱮ ᱡᱟᱹᱨᱤ ᱟᱠᱟᱫᱼᱟ ᱾ ᱟᱨ ᱚᱱᱟ ᱥᱟᱠᱟᱢ ᱨᱮᱫᱚ ᱚᱞ ᱢᱮᱱᱟᱜᱼᱟ ᱵᱟᱝ ᱢᱟ, ᱟᱹᱫᱤᱵᱟᱹᱥᱤ ᱠᱚ ᱟᱠᱚᱣᱟᱜ ᱦᱟᱹᱛᱭᱟᱹᱨ ᱟᱜᱼᱥᱟᱨ ᱟᱠᱚᱣᱟᱜ ᱵᱟᱹᱠᱷᱩᱞ ᱥᱟᱸᱣ ᱟᱠᱚ ᱴᱷᱮᱱ ᱵᱟᱝ ᱠᱚ ᱫᱟᱲᱮᱭᱟᱜᱼᱟ ᱢᱮᱱᱛᱮ ᱵᱩᱨᱩ ᱵᱤᱵᱷᱟᱜ ᱮ ᱯᱟᱥᱱᱟᱣ ᱟᱠᱟᱫ ᱥᱟᱠᱟᱢ ᱨᱮ ᱚᱞ ᱵᱩᱴᱟᱹ ᱟᱠᱟᱱᱟ ᱾ ᱱᱤᱛᱚᱜ ᱵᱩᱨᱩ ᱵᱤᱵᱷᱟᱜ ᱫᱚ ᱚᱫᱚᱱᱛᱤᱼᱥᱤᱛᱟᱱᱚᱫᱤ, ᱵᱟᱨ ᱱᱚᱣᱟᱯᱟᱨᱟ ᱟᱨ ᱵᱷᱚᱨᱚᱢᱫᱮᱵ ᱵᱩᱨᱩ ᱥᱩᱨ ᱠᱚᱨᱮ ᱢᱮᱱᱟᱜ ᱟᱠᱟᱫ ᱠᱚ ᱟᱹᱫᱤᱵᱟᱹᱥᱤ ᱟᱹᱛᱩ ᱠᱚᱨᱮ ᱵᱩᱨᱩ ᱵᱤᱵᱷᱟᱜ ᱨᱤᱱ ᱴᱤᱢ ᱟᱹᱛᱩ ᱟᱹᱛᱩ ᱢᱮᱱ ᱠᱟᱛᱮ ᱟᱹᱫᱤᱵᱟᱹᱥᱤ ᱴᱷᱮᱱ ᱠᱷᱚᱱ ᱟᱜᱼᱥᱟᱨ ᱠᱚ ᱡᱚᱵᱚᱛ ᱟᱹᱜᱩᱭᱮᱫ ᱼᱟ ᱾
ᱜᱷᱚᱴᱚᱱ ᱠᱷᱚᱱ ᱡᱟᱸᱦᱟᱸ ᱵᱟᱰᱟᱭ, ᱢᱟᱨᱪ ᱒᱙ ᱦᱤᱞᱚᱜ ᱱᱚᱣᱟᱯᱟᱨᱟ ᱵᱤᱨ ᱨᱮ ᱚᱱᱟ ᱵᱤᱨ ᱥᱩᱨ ᱟᱹᱛᱩᱨᱤᱱ ᱟᱹᱫᱤᱵᱟᱹᱥᱤ ᱠᱚ ᱵᱤᱨ ᱨᱮ ᱵᱤᱨ ᱡᱤᱭᱟᱹᱞᱤ ᱠᱚ ᱥᱮᱱᱫᱨᱟᱭᱮᱫ ᱠᱚ ᱛᱟᱦᱮᱱ ᱟᱫᱚ ᱩᱱ ᱵᱮᱲᱟ ᱵᱩᱨᱩ ᱵᱤᱵᱷᱟᱜ ᱫᱚ ᱵᱩᱨᱩ ᱠᱚ ᱥᱮᱱᱫᱨᱟᱭᱮᱫ ᱟᱹᱫᱤᱵᱟᱹᱥᱤ ᱠᱚ ᱦᱟᱹᱲᱤ ᱞᱟᱹᱜᱤᱱᱛᱮ ᱥᱟᱯᱽᱲᱟᱣᱚᱵ ᱠᱟᱱ ᱵᱮᱲᱟ ᱨᱮ, ᱵᱤᱨ ᱠᱚ ᱥᱮᱱᱫᱨᱟᱭᱮᱫ ᱟᱹᱫᱤᱵᱟᱹᱥᱤ ᱫᱚ ᱟᱠᱚ ᱧᱤᱨ ᱵᱟᱧᱪᱟᱣᱚᱵ ᱫᱤᱥᱟᱹ ᱠᱟᱛᱮ ᱥᱮᱱᱫᱨᱟᱭᱤᱡ ᱟᱹᱫᱤᱵᱟᱹᱥᱤ ᱫᱚ ᱵᱩᱨᱩ ᱵᱤᱵᱷᱟᱜ ᱨᱤᱱᱤᱡ ᱢᱤᱫ ᱠᱟᱹᱢᱤᱭᱟ ᱯᱚᱞᱤᱥ ᱫᱟᱨᱚᱜᱟ ᱜᱮᱭ ᱛᱩᱧ ᱟᱫᱮᱭᱟ ᱾ ᱛᱟᱭᱚᱢ ᱦᱟᱥᱯᱟᱛᱟᱞ ᱨᱮ ᱡᱚᱠᱷᱚᱱ ᱠᱚ ᱨᱟᱱ ᱟᱨ ᱚᱯᱚᱨᱮᱥᱚᱱ ᱮ ᱠᱟᱱ ᱵᱮᱲᱟ ᱨᱮ ᱟᱹᱠᱤᱱᱟᱜ ᱦᱚᱲᱢᱚ ᱠᱷᱚᱱ ᱩᱜᱞᱤ ᱚᱰᱚᱠ ᱮᱱᱟ ᱾
ᱟᱫᱚ ᱱᱚᱣᱟ ᱨᱟᱹᱜᱤ ᱛᱮ ᱵᱩᱨᱩ ᱵᱤᱵᱷᱟᱜ ᱟᱨ ᱪᱷᱚᱛᱤᱥᱜᱚᱰ ᱥᱚᱨᱚᱠᱟᱨ ᱫᱚ ᱟᱹᱫᱤᱵᱟᱹᱥᱤ ᱠᱚ ᱤᱫᱤ ᱠᱟᱛᱮ ᱱᱚᱝᱠᱟᱱ ᱨᱟᱭ ᱮ ᱤᱫᱤ ᱟᱠᱟᱫᱼᱟ ᱢᱮᱱᱛᱮ ᱟᱧᱡᱚᱢᱚᱜ ᱠᱟᱱᱟ ᱾ ᱟᱵᱚ ᱟᱹᱫᱤᱵᱟᱹᱥᱤ ᱠᱚᱣᱟᱜ ᱥᱟᱨ ᱛᱮ ᱢᱤᱫ ᱯᱚᱞᱤᱥ ᱫᱟᱨᱚᱜᱟᱭ ᱛᱩᱧ ᱚᱪᱚᱣᱟ ᱠᱟᱱᱟ ᱢᱮᱱᱛᱮ ᱱᱚᱣᱟ ᱨᱮᱭᱟᱜ ᱥᱟᱹᱨᱤᱭᱟᱹᱛ ᱯᱨᱚᱢᱟᱱ ᱥᱟᱢᱟᱝ ᱛᱮ ᱱᱤᱛᱚᱜ ᱫᱷᱟᱹᱨᱤᱡ ᱛᱮ ᱦᱚᱸ ᱵᱟᱝ ᱦᱮᱡ ᱟᱠᱟᱱᱟ ᱾
ᱟᱹᱫᱤᱵᱟᱹᱥᱤ ᱟᱠᱚᱣᱟᱜ ᱡᱟᱱᱟᱢ ᱚᱛ ᱦᱟᱥᱟ ᱠᱷᱚᱱ ᱡᱚᱨᱼᱡᱚᱵᱚᱨ ᱫᱚᱥᱛ ᱠᱚ ᱪᱷᱩᱰᱟᱹᱨ ᱚᱪᱚᱜ ᱠᱟᱱ ᱵᱮᱲᱟ ᱨᱮ, ᱟᱠᱚᱣᱟᱜ ᱡᱟᱹᱛᱤᱭᱟᱹᱨᱤ ᱪᱤᱱᱦᱟᱹ ᱫᱚᱦᱚ ᱞᱟᱹᱜᱤᱱᱛᱮ ᱦᱚᱸ ᱥᱚᱨᱚᱠᱟᱨ ᱮ ᱟᱠᱚᱴ ᱠᱮᱫ ᱠᱚᱣᱟ ᱛᱮᱦᱮᱧ ᱟᱹᱫᱤᱵᱟᱹᱥᱤ ᱾ ᱱᱚᱣᱟ ᱨᱟᱭ ᱥᱟᱱᱟᱢ ᱠᱚ, ᱟᱹᱫᱤᱵᱟᱹᱥᱤ ᱚᱥᱛᱤᱛᱷᱭᱚ ᱵᱤᱨᱚᱫᱷᱤ ᱨᱟᱭ ᱠᱟᱱᱟ ᱢᱮᱱᱛᱮ ᱛᱮᱦᱮᱧ ᱥᱟᱱᱟᱢ ᱟᱹᱫᱤᱵᱟᱹᱥᱤ ᱥᱚᱢᱟᱡᱽ ᱨᱤᱱ ᱵᱩᱫᱷᱤᱡᱤᱵᱤ ᱢᱚᱦᱚᱞ ᱠᱷᱚᱱ ᱟᱸᱧᱡᱚᱢᱚᱜ ᱠᱟᱱᱟ ᱾
©ᱵᱭᱩᱨᱚ ᱨᱤᱯᱚᱨᱴ ᱼ ᱥᱟᱨᱱᱟ ᱢᱮᱰᱤᱭᱟ
Good Job Sarna Media...
ReplyDelete