ᱟᱹᱫᱤᱵᱟᱹᱥᱤ ᱥᱚᱢᱟᱡᱽ ᱛᱟᱞᱟ ᱨᱮ ᱧᱮᱞ ᱧᱟᱢ ᱟᱠᱟᱱᱟ ᱟᱹᱰᱤ ᱢᱟᱨᱟᱝ ᱥᱚᱢᱟᱡᱽ ᱥᱩᱫᱷᱟᱹᱨᱚᱜ ᱨᱮᱭᱟᱜ ᱢᱟᱦᱟᱞ ᱾ ᱞᱟᱦᱟ ᱠᱷᱚᱱ ᱜᱮ ᱜᱩᱨᱞᱟᱹᱣᱟᱵ ᱠᱟᱱ ᱵᱮᱣᱨᱟ ᱦᱟᱸᱰᱤ ᱯᱟᱨᱩᱣᱟᱹ ᱱᱤᱥᱟᱹ ᱵᱚᱫᱚᱞ ᱵᱮᱨᱮᱞ ᱫᱟᱜ ᱨᱮᱭᱟᱜ ᱵᱮᱵᱷᱟᱨ ᱱᱟᱣᱟ ᱨᱩᱯ ᱞᱮᱠᱟᱛᱮ ᱥᱟᱸᱣᱛᱟ ᱠᱟᱹᱢᱤᱦᱚᱨᱟ ᱾ ᱱᱟᱭ ᱱᱟᱯᱟᱭ ᱛᱮ ᱪᱟᱞᱟᱣᱮᱱ ᱡᱩᱱ ᱓ ᱢᱟᱹᱦᱤᱛ ᱦᱤᱞᱚᱜ ᱟᱹᱫᱤᱵᱟᱹᱥᱤ ᱥᱮᱝᱜᱮᱞ ᱚᱵᱷᱤᱡᱟᱱ ᱥᱟᱹᱦᱤᱡᱩᱦᱤ ᱨᱮ ᱟᱹᱫᱤᱵᱟᱹᱥᱤ ᱥᱮᱝᱜᱮᱞ ᱚᱵᱷᱤᱡᱟᱱ ᱠᱚᱨᱚᱧᱡᱤᱭᱟᱹ ᱵᱞᱚᱠ ᱯᱟᱨᱥᱮᱛ ᱢᱟᱱᱚᱛᱟᱱ ᱯᱤᱛᱷᱚ ᱢᱟᱹᱡᱷᱤ ᱛᱮᱠᱤᱱᱟᱜ ᱥᱟᱹᱜᱩᱱ ᱵᱟᱯᱞᱟ ᱟᱹᱠᱤᱱᱟᱜ ᱡᱟᱱᱟᱢ ᱟᱹᱛᱩ ᱠᱚᱨᱚᱧᱡᱤᱭᱟᱹ ᱵᱞᱚᱠ ᱥᱩᱱᱰᱤᱠᱩᱫᱩᱨ ᱟᱹᱛᱩ ᱜᱚᱨᱟᱢ ᱨᱮ ᱡᱟᱠ ᱡᱚᱢᱚᱠ ᱨᱟᱹᱥᱠᱟᱹ ᱥᱟᱹᱦᱤᱡ ᱟᱹᱫᱤᱵᱟᱹᱥᱤ ᱥᱮᱝᱜᱮᱞ ᱚᱵᱷᱤᱡᱟᱱ ᱩᱫᱩᱜ ᱟᱠᱟᱫ ᱱᱟᱣᱟ ᱰᱟᱦᱟᱨ ᱞᱮᱠᱟᱛᱮ ᱵᱟᱯᱞᱟ ᱠᱟᱹᱢᱤᱦᱚᱨᱟ ᱦᱩᱤ ᱥᱟᱹᱛ ᱟᱠᱟᱱᱟ ᱾
ᱵᱮᱣᱨᱟ ᱠᱷᱚᱱ ᱵᱟᱰᱟᱭᱚᱜ ᱠᱟᱱᱟ, ᱱᱚᱣᱟ ᱦᱟᱸᱰᱤ ᱵᱚᱫᱚᱞ ᱥᱟᱸᱣᱛᱟ ᱛᱟᱞᱟᱨᱮ ᱵᱮᱨᱮᱞ ᱫᱟᱜ ᱨᱮᱭᱟᱜ ᱵᱮᱵᱷᱟᱨ ᱥᱩᱢᱟ.ᱫᱽ ᱯᱤᱛᱷᱚ ᱢᱟᱹᱡᱷᱤ ᱜᱚᱢᱠᱮ ᱛᱮᱠᱤᱱ ᱴᱷᱮᱫ ᱥᱩᱢᱩᱝ ᱫᱚ ᱵᱟᱹᱱᱩᱜ ᱟᱠᱟᱫ-ᱟ ᱾ ᱟᱹᱫᱤᱵᱟᱹᱥᱤ ᱥᱮᱝᱜᱮᱞ ᱚᱵᱷᱤᱡᱟᱱ ᱥᱟᱹᱦᱤᱡᱩᱦᱤ ᱨᱮ ᱵᱤᱦᱟᱨ, ᱵᱮᱝᱜᱚᱞ, ᱟᱥᱟᱢ, ᱚᱰᱤᱥᱟ, ᱡᱷᱟᱨᱠᱷᱚᱱᱰ, ᱱᱮᱯᱟᱲ, ᱵᱷᱩᱴᱟᱱ ᱟᱨ ᱵᱟᱝᱜᱞᱟᱫᱮᱥ ᱠᱚᱨᱮ ᱦᱚᱸ ᱱᱚᱣᱟ ᱦᱟᱸᱰᱤ ᱱᱤᱥᱟᱹ ᱵᱚᱫᱚᱞ ᱵᱮᱨᱮᱞ ᱫᱟᱜ ᱨᱮᱭᱟᱜ ᱵᱮᱵᱷᱟᱨ ᱠᱟᱹᱢᱤᱦᱚᱨᱟ ᱞᱟᱦᱟ ᱟᱠᱟᱱᱟ ᱾ ᱥᱟᱸᱣᱛᱟ ᱛᱟᱞᱟᱨᱮ ᱦᱟᱹᱰᱤ ᱯᱟᱨᱩᱣᱟᱹ ᱱᱤᱥᱟᱹ ᱪᱟᱵᱟ ᱞᱮᱱ ᱮᱱᱟᱝ ᱜᱮ ᱟᱹᱫᱤᱵᱟᱹᱥᱤ ᱥᱚᱢᱟᱡᱽ ᱫᱚ ᱢᱟᱲᱟᱝ ᱥᱮᱫ ᱮ ᱞᱟᱦᱟ ᱠᱮᱭᱟ ᱢᱮᱱᱛᱮ ᱥᱮᱝᱜᱮᱞ ᱚᱵᱷᱤᱡᱟᱱ ᱠᱟᱛᱷᱟᱭ ᱫᱚᱦᱚ ᱟᱠᱟᱫ-ᱟ ᱾ ᱚᱱᱟᱛᱮ ᱥᱮᱝᱜᱮᱞ ᱚᱵᱷᱤᱡᱟᱱ ᱫᱚ ᱥᱟᱸᱣᱛᱟ ᱠᱟᱢᱤᱦᱚᱨᱟᱨᱮ ᱦᱟᱸᱰᱤ ᱱᱤᱥᱟᱹ ᱵᱮᱵᱷᱟᱨ ᱫᱚᱭ ᱦᱟᱹᱯᱤᱫᱮᱜ ᱟᱭ ᱾
ᱠᱚᱨᱚᱧᱡᱤᱭᱟᱹ ᱯᱚᱞᱤᱥ ᱯᱨᱚᱥᱟᱥᱚᱱ ᱟᱨ ᱟᱹᱫᱤᱵᱟᱹᱥᱤ ᱥᱮᱝᱜᱮᱞ ᱚᱵᱷᱤᱡᱟᱱ ᱥᱟᱹᱦᱤᱡᱩᱦᱤ ᱨᱮ ᱢᱟᱱᱚᱛᱟᱱ ᱯᱤᱛᱷᱚ ᱢᱟᱹᱡᱷᱤ ᱠᱚᱨᱚᱧᱡᱤᱭᱟᱹ ᱵᱞᱚᱠ ᱥᱮᱝᱜᱮᱞ ᱚᱵᱷᱤᱡᱟᱱ ᱯᱟᱨᱥᱮᱛ ᱥᱟᱸᱣ ᱠᱚᱨᱚᱧᱡᱤᱭᱟᱹ ᱵᱞᱚᱠ ᱥᱮᱝᱜᱮᱞ ᱯᱟᱨᱜᱟᱱᱟ, ᱚᱱᱛᱚᱥᱟᱦᱤ ᱜᱚᱨᱟᱢ ᱨᱮᱱᱤᱡ ᱢᱟᱱᱚᱛᱟᱱ ᱥᱨᱤᱫᱷᱚᱨ ᱴᱩᱰᱩ ᱛᱮᱠᱤᱱᱤᱡ ᱥᱟᱫᱷᱮᱨ ᱦᱚᱯᱚᱱ ᱮᱨᱟ ᱵᱩᱰᱤ ᱫᱩᱞᱟᱹᱨᱤ ᱴᱩᱰᱩ ᱛᱮᱠᱤᱱ ᱥᱟᱸᱣ ᱟᱹᱠᱤᱱᱟᱜ ᱥᱟᱹᱜᱩᱱ ᱵᱟᱯᱞᱟ ᱫᱚ ᱵᱮᱜᱚᱨ ᱦᱟᱸᱰᱤ ᱯᱟᱨᱩᱣᱟᱹ ᱱᱤᱥᱟᱹ ᱛᱟᱞᱟᱛᱮ ᱱᱟᱭ ᱱᱟᱯᱟᱭ ᱨᱟᱹᱥᱠᱟᱹ ᱛᱟᱞᱟᱛᱮ ᱦᱩᱭ ᱥᱟᱹᱛ ᱟᱠᱟᱱᱟ ᱾
ᱥᱟᱹᱜᱩᱱ ᱵᱟᱯᱞᱟ ᱨᱮ ᱯᱮᱲᱟ ᱯᱨᱚᱵᱷᱩ ᱠᱚ ᱥᱟᱸᱣ ᱛᱮ ᱛᱤᱨᱤᱝ, ᱵᱚᱦᱚᱲᱫᱟ, ᱨᱟᱭᱨᱚᱝᱯᱩᱨ, ᱡᱟᱢᱫᱟ, ᱵᱤᱥᱚᱤ, ᱵᱟᱫᱷᱟᱢ ᱯᱟᱦᱟᱲ, ᱡᱚᱥᱤᱯᱩᱨ, ᱠᱚᱨᱚᱧᱡᱤᱭᱟᱹ, ᱥᱟᱸᱣ ᱠᱮᱸᱣᱡᱷᱚᱨ ᱟᱨ ᱡᱟᱡᱯᱩᱨ ᱥᱟᱸᱣᱛᱮ ᱟᱹᱰᱤ ᱟᱭᱢᱟ ᱴᱚᱴᱷᱟ ᱠᱚᱨᱮ ᱠᱷᱚᱱ ᱥᱮᱝᱜᱮᱞ ᱱᱮᱛᱟ ᱥᱟᱸᱣ ᱥᱮᱝᱜᱮᱞ ᱠᱟᱹᱢᱤᱭᱟᱹ ᱠᱚ ᱵᱟᱯᱽᱞᱟ ᱠᱟᱹᱢᱤᱦᱚᱨᱟ ᱨᱮ ᱥᱮᱴᱮᱨ ᱥᱮᱞᱮᱫ ᱠᱚ ᱛᱟᱸᱦᱮ ᱠᱟᱱᱟ ᱾
ᱵᱮᱣᱨᱟ ᱛᱩᱢᱟᱹᱞ ᱨᱮ ᱥᱟᱨᱱᱟ ᱢᱮᱰᱤᱭᱟ
No comments:
Post a Comment