ᱵᱤᱡᱟᱛᱟᱲᱟ, ᱨᱟᱭᱨᱚᱝᱯᱩᱨ
ᱫᱤᱥᱚᱢ ᱯᱟᱲᱟᱨᱮ ᱜᱚᱴᱟ ᱜᱮ ᱥᱤᱛᱩᱝ ᱞᱚᱞᱚ ᱨᱮᱭᱟᱜ, ᱥᱤᱛᱩᱝ ᱞᱚᱞᱚ ᱟᱦᱟᱞᱟ ᱥᱟᱱᱟᱢ ᱯᱟᱲᱟ ᱜᱮ ᱵᱟᱹᱲᱛᱤ ᱤᱫᱤᱭᱟ ᱠᱟᱱᱟ ᱾ ᱪᱮᱬᱮ ᱪᱤᱯᱨᱩᱡ ᱵᱤᱨ ᱡᱟᱱᱣᱟᱨ ᱴᱷᱮᱱ ᱠᱷᱚᱱ ᱮᱦᱚᱵ ᱠᱟᱛᱮ ᱢᱟᱹᱱᱢᱤ ᱦᱚᱯᱚᱱ ᱠᱚ ᱛᱟᱞᱟ ᱨᱮᱦᱚᱸ ᱫᱟᱜ ᱨᱮᱱᱟᱜ ᱟᱱᱟᱴ ᱥᱟᱢᱟᱝ ᱛᱮ ᱦᱮᱡ ᱟᱠᱟᱱᱟ ᱾ ᱟᱵᱚ ᱠᱚ ᱛᱟᱞᱟ ᱨᱮ ᱢᱮᱱᱟᱜ ᱟᱠᱟᱫᱮ ᱥᱚᱨᱠᱟᱨ, ᱧᱩ ᱫᱟᱜ ᱨᱮᱭᱟᱜ ᱟᱱᱟᱴ ᱮᱴᱠᱮᱴᱚᱬᱮ ᱟᱞᱚᱵᱚᱱ ᱧᱮᱞ ᱡᱚᱝ ᱢᱟ ᱫᱤᱥᱟᱹ ᱠᱟᱛᱮ, ᱟᱹᱛᱩ ᱟᱹᱛᱩ, ᱱᱟᱜᱟᱨ ᱱᱟᱜᱟᱨ ᱢᱟᱨᱟᱝ ᱫᱟᱜ ᱴᱟᱝᱠᱤ, ᱚᱲᱟᱜ ᱨᱮᱭᱟᱜ ᱫᱩᱣᱟᱹᱨ ᱫᱩᱣᱟᱹᱨ ᱯᱟᱭᱤᱯ ᱫᱟᱜ ᱨᱮᱭᱟᱜ ᱵᱮᱵᱚᱥᱛᱟ ᱵᱟᱝ ᱢᱟ ᱡᱩᱜᱟᱹᱲ ᱢᱮᱱᱟᱜ ᱟᱠᱟᱫ-ᱟ ᱾ ᱢᱮᱱᱠᱷᱟᱱ ᱫᱩᱠ ᱨᱮᱱᱟᱜ ᱠᱟᱛᱷᱟ ᱥᱚᱨᱠᱟᱨᱟᱜ ᱥᱩᱵᱤᱫᱷᱟ ᱠᱚᱫᱚ ᱡᱚᱛᱚ ᱠᱟᱜᱚᱡᱽ ᱥᱟᱠᱟᱢ ᱨᱮᱜᱮᱡ ᱴᱷᱟᱠᱮᱫ ᱛᱟᱸᱦᱮ ᱟᱠᱟᱱᱟ ᱾
ᱱᱚᱝᱠᱟ ᱜᱮ ᱧᱩ ᱫᱟᱜ, ᱩᱢ ᱟᱹᱨᱩᱵᱚᱜ ᱫᱟᱜ ᱨᱮᱭᱟᱜ ᱟᱱᱟᱴ ᱧᱮᱞ ᱧᱟᱢ ᱟᱠᱟᱱᱟ ᱢᱚᱭᱩᱨᱵᱷᱚᱸᱡᱽ ᱡᱤᱞᱞᱟ ᱵᱤᱡᱟᱛᱟᱲᱟ ᱵᱞᱚᱠ ᱵᱚᱱᱠᱟᱴᱷᱤ ᱯᱚᱱᱪᱟᱭᱚᱛ ᱨᱮ ᱢᱮᱱᱟᱜ ᱟᱠᱟᱫ ᱛᱟᱞᱰᱤᱦᱟ ᱟᱹᱛᱩ ᱜᱚᱨᱟᱢ ᱨᱮ ᱧᱮᱞ ᱧᱟᱢ ᱟᱠᱟᱱᱟ ᱧᱩ ᱫᱟᱜ ᱨᱮᱭᱟᱜ ᱢᱟᱨᱟᱝ ᱮᱴᱠᱮ ᱴᱚᱬᱮ ᱾ ᱟᱹᱛᱩ ᱦᱚᱲ ᱠᱚ ᱧᱩ ᱫᱟᱜ ᱴᱷᱮᱱ ᱠᱷᱚᱱ ᱮᱦᱚᱵ ᱠᱟᱛᱮ, ᱩᱢ ᱟᱹᱨᱩᱵᱚᱜ ᱫᱷᱟᱹᱵᱤᱡ ᱫᱟᱜ ᱨᱮᱭᱟᱜ ᱟᱱᱟᱴ ᱠᱚ ᱧᱮᱞ ᱡᱚᱝ ᱠᱟᱱᱟ ᱾ ᱜᱟᱰᱟ ᱢᱩᱰᱩ ᱟᱦᱟᱨ ᱯᱩᱠᱷᱨᱤ ᱥᱤᱛᱩᱝ ᱛᱮ ᱫᱟᱜ ᱟᱝᱡᱮᱫᱚᱜ ᱠᱟᱱ ᱛᱮ ᱜᱟᱰᱟ ᱢᱩᱰᱩ ᱫᱷᱟᱨᱮ ᱦᱚᱨ ᱵᱤᱨ ᱠᱚᱨᱮ ᱜᱟᱹᱭ ᱠᱟᱰᱟ, ᱢᱤᱦᱩ ᱢᱮᱨᱚᱢ ᱥᱤᱛᱩᱝ ᱟᱦᱟᱞᱟ ᱫᱟᱜ ᱛᱮᱛᱟᱝ ᱛᱮᱠᱚ ᱜᱚᱡ ᱜᱩᱨᱚᱜ ᱠᱟᱱᱟ ᱾ ᱟᱹᱛᱩ ᱜᱚᱨᱟᱢ ᱨᱮ ᱢᱟᱹᱱᱢᱤ ᱡᱤᱣᱤ ᱠᱷᱟᱱᱰᱟᱣ ᱦᱚᱸ ᱧᱩᱛᱟᱹᱛ ᱜᱮ ᱵᱩᱡᱷᱟᱹᱣᱚᱵ ᱠᱟᱱᱟ ᱾ ᱛᱟᱞᱰᱤᱦᱟ ᱟᱹᱛᱩ ᱜᱚᱨᱟᱢ ᱨᱮ ᱧᱩ ᱫᱟᱜ ᱥᱟᱹᱯᱞᱟᱹᱭᱚᱜ-ᱟ ᱢᱮᱱᱛᱮ ᱒᱐᱒᱓ ᱠᱷᱚᱱ ᱢᱟᱨᱟᱝ ᱫᱟᱜ ᱴᱟᱝᱠᱤ ᱵᱮᱱᱟᱣ ᱪᱟᱹᱞᱩᱣᱟᱠᱟᱱᱟ ᱾ ᱴᱚᱞᱟ ᱠᱩᱞᱦᱤ ᱛᱮ ᱯᱟᱭᱤᱯ ᱦᱚᱸ ᱟᱴᱮᱫ ᱟᱠᱟᱱᱟ ᱾ ᱢᱮᱱᱠᱷᱟᱱ ᱚᱱᱟ ᱠᱟᱹᱢᱤ ᱦᱚᱸ ᱥᱩᱡᱩᱛ ᱥᱟᱹᱦᱤᱡ ᱛᱮ ᱵᱟᱝᱜᱮ ᱠᱟᱹᱢᱤ ᱟᱠᱟᱱᱟ ᱾ ᱠᱟᱹᱢᱤ ᱛᱚᱨᱟᱣᱮᱫ ᱴᱷᱤᱠᱟᱫᱟᱨ ᱠᱚᱴᱨᱟᱠᱴᱚᱨ ᱥᱚᱝᱥᱛᱷᱟ ᱠᱚ ᱟᱫ ᱪᱟᱵᱟᱭᱮᱱᱟ ᱾ ᱟᱛᱨᱟ ᱨᱮᱜᱮ ᱫᱟᱜ ᱴᱟᱝᱠᱤ ᱠᱟᱹᱢᱤ ᱦᱟᱹᱯᱤᱫ ᱢᱮᱱᱟᱜ ᱟᱠᱟᱫ-ᱟ ᱾ ᱟᱨ ᱱᱚᱛᱮ ᱫᱟᱜ ᱫᱟᱨᱟᱢ ᱪᱮᱬᱮ ᱞᱮᱠᱟ ᱧᱩ ᱫᱟᱜ ᱦᱤᱡᱩᱜ ᱛᱟᱸᱜᱤᱨᱮ ᱟᱹᱛᱩ ᱜᱟᱸᱣᱞᱟ ᱦᱚᱲ ᱾
ᱧᱩ ᱫᱟᱜ ᱨᱮᱭᱟᱜ ᱟᱱᱟᱴ ᱩᱥᱟᱹᱨᱟᱹ ᱥᱚᱞᱦᱮᱜ ᱢᱟ ᱢᱮᱱᱛᱮ ᱥᱟᱱᱟᱢ ᱟᱹᱛᱩ ᱜᱟᱸᱣᱞᱟ ᱠᱚᱣᱟᱱᱛᱮ BDO Bijatala ᱥᱟᱞᱟᱜ ᱛᱮ District collector Mayurbhanj ᱢᱤᱫ ᱟᱨᱫᱟᱥ ᱥᱟᱠᱟᱢ ᱠᱚ ᱪᱟᱞ ᱟᱠᱟᱫ ᱠᱤᱱᱟ ᱾ ᱡᱮᱢᱚᱱ ᱩᱥᱟᱹᱨᱟᱹ ᱥᱟᱹᱦᱤᱡ ᱛᱮ ᱛᱟᱞᱰᱤᱦᱟ ᱟᱹᱛᱩ ᱜᱚᱨᱟᱢ ᱨᱮ ᱧᱩ ᱫᱟᱜ ᱨᱮᱭᱟᱜ ᱩᱪᱤᱛ ᱵᱮᱵᱚᱥᱛᱟ ᱦᱩᱭᱩᱜ ᱢᱟ ᱾ ᱧᱩ ᱫᱟᱜ ᱨᱮᱭᱟᱜ ᱟᱱᱟᱴ ᱩᱥᱟᱹᱨᱟᱹ ᱵᱟᱝ ᱥᱚᱞᱦᱮᱜ ᱞᱮᱱᱠᱷᱟᱱ, ᱦᱤᱡᱩᱜ ᱠᱷᱟᱱ ᱵᱷᱚᱴ ᱵᱟᱪᱷᱟᱣ ᱨᱮ ᱵᱷᱚᱴ ᱵᱟᱝ ᱮᱢᱚᱜ ᱵᱷᱚᱴ ᱵᱚᱨᱡᱚᱱ ᱞᱟᱹᱜᱤᱫ ᱛᱮᱦᱚᱸ ᱫᱷᱚᱢᱚᱠ ᱠᱚ ᱮᱢ ᱟᱠᱟᱫ-ᱟ ᱟᱹᱛᱩ ᱜᱟᱸᱣᱞᱟ ᱾
Bureau Report Sarna Media
Rairangpur Mayurbhanj
No comments:
Post a Comment